Árið 2019 var fjöldi ökutækja samstæðunnar 80 og heildar eldsneytisnotkun 122 þúsund lítrar. Árið 2020 var fjöldi ökutækja 88 og heildar eldsneytisnotkun 120 þúsund lítrar. Distica fjölgaði bílum fyrir flutning á vörum í stað þess að kaupa þjónustu af þriðja aðila. Án breytts fyrirkomulags Distica hefði bein losun eldsneytis dregist saman um 12%.

Eitt af meginmarkmiðum Veritas er að tryggja að orkunotkun sé haldið í lágmarki og leitast er við að draga úr mengun í allri starfsemi. Rafmagnsnotkun og notkun á heitu vatni hjá Veritas samstæðunni var í heild 14 tonn CO₂ eða um 2% af heildarlosun samstæðunnar og er öll orka til húshitunar græn orka. Losun samstæðunnar hverju sinni er háð umfangi starfseminnar og takmörkuð tækifæri eru í að draga úr losun fyrir þessa liði. Nánast enginn munur er á rafmagnsnotkun á milli ára en notkun á heitu vatni hjá samstæðunni jókst um 2% á milli ára, aðallega vegna aukningar hjá Distica um 10%.

Óbein losun frá starfseminni, þ.e. losun vegna vara/þjónustu annarra og losun vegna vöru og þjónustu starfseminnar er að hluta til tilgreind í skýrslunni. Þar má nefna innflutning á vörum, dreifingu á vörum, meðhöndlun úrgangs og flugs bæði innanlandsflugs og flugs erlendis.

Árið 2018 var fjárfest í endurnýtanlegum kössum til flutninga á vörum frá Distica og eru frauðkassar einungis notaðir í einstaka sendingum. Leitast er við að endurnýta sem best tróð sem notað er til þess að vernda vörurnar, en mest er notað af brúnum pappa og bóluplasti. Á það þó eingöngu við um vörur en ekki lyf. Notkun á plastpokum hefur minnkað umtalsvert á milli ára. Aukning hefur aftur á móti verið á innkaupum á bóluplasti og strekkifilmum á milli áranna 2019-2020 en það skýrist að nokkru leyti af auknum umsvifum á milli ára í heilsuvörum, þar sem vörur eru afhentar í brettatali.

Veritas hefur gert samning við Kolvið um kolefnisjöfnun bifreiða í eigu samstæðunnar. Kolefnisspor Veritas samstæðunnar árið 2020 fyrir kolefnisjöfnun var 859 tonn CO₂. Veritas samstæðan gróðursetti 275 tré í samstarfi við starfsmenn og kolefnisjafnaði þannig 281 tonn CO₂. Heildar kolefnisfótspor samstæðunnar árið 2020 var því 578 tonn CO₂_.

Reiknivélin miðar við meðalbindingu á ári í skógi - án tillits til binditíma upp á 60 ár eins og Kolviður gerir. Því eru reikningar byggðir á því að einhver binding verði á hverju ári sem má færa inn í bókhaldið, ekki aðeins einu sinni eins og hjá Kolviði. Hér er miðað við bindingu með þeirri blöndu trjáa sem Kolviður notast við.

Árið 2018 var farið í herferð í flokkunarmálum fyrirtækisins og flokkunarskipulag betur mótað en áður. Það skilaði bættum flokkunarárangri. Frá 2018 hefur árlega verið haldinn Flokkóber í október en sá mánuður er nýttur til aukinnar fræðslu og tiltektar í flokkunarmálum, ef á þarf að halda og einnig til þess að vekja fólk almennt til umhugsunar um flokkun og umhverfismál. Síðastliðin ár hefur utanaðkomandi ráðgjafi heimsótt fyrirtækin og veitt ráðgjöf í flokkunarmálum. Hvert og eitt fyrirtæki hefur síðan tekið málin í sínar hendur. Í Flokkóber er fræðsla á sal og tíðar færslur á Workplace um flokkun og umhverfismál. Leitast er við að hafa alvöru og léttleika í bland til þess að fanga athygli starfsmanna. Vegna samkomutakmarkana 2020 var meginþungi Flokkóber á Workplace það árið.

Persónan Ruslana varð til í Flokkóber verkefninu fyrir nokkrum árum en það er Sonja B. Guðfinnsdóttir sem bjó til þá persónu.

Mikil áhersla er lögð á að draga úr matarsóun og er fræðsla til starfsmanna mikilvægur þáttur í því að allir dansi í takt. Mötuneytið er í lykilstöðu þegar kemur að útfærslu á markmiðum Veritas í umhverfismálum. Í björtum og glæsilegum matsal með útsýni yfir Esjuna nærast starfsmenn og hittast. Matreiðslumeistarinn Jón Elvar Hafsteinsson er óþreytandi í því að finna upp nýjar og spennandi leiðir við að lágmarka matarsóun í félaginu.

„Ég nýti matinn mjög vel og bý til nýja, skemmtilega og óvænta rétti. Einn vinsælasti rétturinn hjá mér er úr umframhráefni sem hefur farið í frystinn. Það er plokkfiskur sem ég geri úr úrvalshráefni, oftast kartöflum og fiski. Plokkfiskurinn er gerður einu sinni í mánuði úr þessu fína hráefni sem hefur orðið afgangs aðra daga þegar fiskur hefur verið á borðum. Þegar samstarfskona okkar hóf að baka gríðarlega gott rúgbrauð þá jukust vinsældir réttarins. Mér finnst þetta góð stefna í grunninn en auðvitað verða að vera einhverjar línur í þessu, en aðalatriðið er að ef maður er með gott hráefni þá er óþarfi að henda því. " segir Jón Elvar Hafsteinsson, matreiðslumeistari.

„Við flokkum kálafskurða á sérstakan stað og gefum kanínubændum til fóðurs fyrir kanínurnar þeirra. Einnig fara hrísgrjónaafgangar til hænsnabónda ef þeir hafa ekki nýst í annað. Við reynum alltaf að láta matinn nýtast sem best og fyrir nokkrum árum tókum við upp á því að bjóða starfsmönnum að taka umframmat með sér heim á föstudögum. Það hefur mælst mjög vel fyrir." segir Jón Elvar.

Íslenska gámafélagið (ÍGF) þjónustar Veritas með alla sorphirðu. Árið 2019 hóf ÍGF útflutning á almennu sorpi til orkuvinnslu í Evrópu og því er ekkert af því sorpi sem ÍGF sækir til Veritas urðað.

Veritas hefur það að markmiði að auka flokkun á sorpi, stuðla að endurnýtingu og endurvinnslu. Miðað er við að endurvinnsluhlutfall sé 50% eða hærra. Endurvinnsla hefur gengið vel með samhentu átaki en ennþá er verk að vinna. Endurvinnsluhlutfall samstæðunnar hefur verið að batna á undanförnum árum og er nú komið í 60% en hlutfallið jókst um 5% milli áranna 2019 og 2020.

Magn urðunarúrgangs minnkaði um 8 tonn og urðun lífræns úrgangs minnkaði um 1 tonn.

Fyrirtæki Veritas leggja mikinn metnað í að vera einungis með þekktar gæðavörur frá framleiðendum sem uppfylla ströngustu gæðakröfur. Það skiptir máli að leitast við að hafa áhrif á birgjana en smæð félagsins hefur þar einnig áhrif og því verða áhrifin á birgjana alltaf háð því. Aftur á móti eru birgjar Veritas leiðandi í sjálfbærnimálum en ekki fylgjendur og leggja sífellt meiri áherslu á að bæta sig í sjálfbærni og samfélagslegri ábyrgð. Að auki eru endursöluaðilar farnir að gera kröfur og hafna vörum sem ekki eru í umhverfisvænum umbúðum eða í of miklum umbúðum. Þannig fær sjálfbærni sífellt meira vægi.

„Það skiptir máli í markaðssetningunni hjá okkur að geta sagt að vörurnar séu framleiddar á umhverfisvænan hátt eða að framleiðandinn kolefnisjafni sinn rekstur. Það er auðveldara að markaðssetja þannig vörur og ef maður getur valið á milli A og B þá verða skilaboðin alltaf betri með vöru A ef hún er sjálfbærari. Við höfum ekki sett neina fyrirvara í birgjamatið hjá okkur um samfélagslega ábyrg sjónarmið en við höfum frekar áhuga á vörum sem eru lífrænar, vistvænar og allt það. Við höfum líka áhuga á vörum sem skapa okkur tekjur og reynum almennt að flagga því í sölu ef vörurnar eða umbúðirnar eru í sjálfbærum flokki." segir Brynjúlfur Guðmundsson, framkvæmdastjóri Artasan.

„Við höfum tekið mjög jákvætt skref á árinu hvað varðar birgjana. Þegar við erum að velja okkur samstarfsaðila þá horfum við sérstaklega til samfélagslegrar ábyrgðar þeirra. Það er í raun hápunkturinn á því sem við höfum verið að gera í ár. Við erum ekki bara að athuga hvort tilboðið sem við fáum sé gott fjárhagslega heldur sendum við líka spurningalista á samstarfsaðila okkar þar sem þeir þurfa að svara því hvað þeir eru að gera í sambandi við samfélagsleg málefni. Mér finnst það ótrúlega mikið framfaraskref og þannig munu samstarfsaðilar okkar hjálpa okkur á þeirri vegferð að verða samfélagslega ábyrg fyrirtæki og áhrifin verða ennþá meiri en ella. " segir Arnar Þórðarson, framkvæmdastjóri Vistor.

Markmið fyrirtækisins er að auka hlutdeild pappírslausra viðskipta sem þó uppfylla allar gæðakröfur. Miðað er við að útprentun á pappír sé í lágmarki og minnki með árunum.

11% fækkun varð á fjölda prentaðra blaða á milli áranna 2019 og 2020 . Það skýrist af ýmiss konar breyttu verklagi innan samstæðunnar s.s. innleiðingu rafrænna undirskrifta, aukningu á pappírslausum samskiptum innanhúss og rafrænni vistun gagna. Unnið er að því að minnka pappír sem fer með sendingum úr húsi og fá viðskiptavinir upplýsingarnar sendar með rafrænum hætti. Einnig eru í gangi fleiri umbótaverkefni sem munu leiða af sér minni prentun hjá samstæðunni en magn útprentaðra blaða per vinnudag er 3.300 blöð. Miðað við markmið 2021 er til mikils að vinna að umbótum.

Dagar sjá um allar ræstingar hjá fyrirtækinu en Dagar eru Svansvottað fyrirtæki sem leggur áherslu á umhverfismál. Frá árinu 2009 hefur efnanotkun minnkað um 60,8% á hvern ræstan fermetra hjá þeim. Dagar axla samfélagslega ábyrgð á þrennan hátt: í starfsemi fyrirtækisins, í mannauðsmálum

og á sviðum er varða íslenskt samfélag. Dagar urðu fyrir valinu vegna þess að fyrirtækið lætur til sín taka í umhverfisvernd, öryggismálum, jafnréttismálum, málrækt, stuðningi við starfsfólk af erlendum uppruna og í bættu heilbrigði og mataræði. Dagar eru einnig aðili að Festu, er fyrirmyndarfyrirtæki Creditinfo og innan fyrirtækisins starfar vinnuhópur um samfélagslega ábyrgð.

Samstæðan stendur mjög vel í mörgum þáttum sjálfbærni og samfélagsábyrgðar en stjórnendur og starfsmenn eru sammála um að halda áfram að sækja fram. Umhverfismálin eru sá flokkur sem kallar hvað mest á áherslur og breytingar og því verður þungi samstæðunnar á þau næstu misserin, eins og lesa má í skammtíma- og langtímamarkmiðum. Einnig hafa stjórnendur verið að velta fyrir sér hvernig nýta megi hugmyndafræðina um hringrásarhagkerfið í rekstrinum.   

„Við gætum farið að velta fyrir okkur að greina betur þau efni sem eru í tækjunum með tilliti til hringrásarhagkerfisins. Er hægt að endurnýta meira? Hvað verður um eldri tæki? Það er engin spurning að hægt er að taka meira tillit til umhverfismála, en hér er verið að vinna með ýmis efni. Eðli málsins samkvæmt þá erum við að sérsníða svo mikið af tækjum fyrir fólk sem hentar þeirra þörfum en ekki annarra. Það er aftur á móti spurning hvernig hægt væri að nota efniviðinn aftur eða senda til endurnýtingar." segir Ólafía Ása Jóhannesdóttir, framkvæmdastjóri hjá Stoð.

Ein þeirra hugmynda sem komið hefur upp hjá fyrirtækinu er að hefja átak sem skapar meðvitund um ábyrga lyfjaförgun. Verklagsreglur um förgun lyfja eru skýrar en lyfjum þarf að farga samkvæmt ströngum kröfum Lyfjastofnunar. Öll lyf sem farga þarf frá samstæðunni fara til förgunar í Kölku, eyðingarstöð á Suðurnesjum. Kalka er eina fyrirtækið sem hefur leyfi Umhverfisstofnunar til að eyða lyfjum. Þegar eftirritunarskyldum lyfjum er fargað fer starfsmaður frá Distica með og fylgir þeim alla leið í brennslu. Einnig berast lyf frá einstaka apóteki og heilsugæslustöðvum sem fá sömu meðferð og lyf frá Veritas.

Á árinu 2019 var 19.823 kg af lyfjum fargað en aðeins 7.787 kg árið 2020. Magnið árið 2020 er óvenju lágt en vegna COVID-19 var farið í færri eyðingarferðir. Búast má við því að tölurnar fyrir 2021 verði hærri fyrir vikið. Önnur fyrri ár voru einnig skoðuð, eins og sést á myndinni.